RTP- investeringsplanen til Vestland fylkeskommune skal rullerast

Region Fjordane har følgjande innspel til rullering av Regional Transportplan i 2025.

1.    Region Fjordane forventar at Vestland fylkeskommune står fast på dei prosjekta som er prioriterte i økonomiplanen vedteken juni 2024. I Region Fjordane gjeld det gjennomføring av følgjande gryteklare prosjekt: 
•    Atløysambandet (ferjeavløysing) 
•    Fv. 609 Heilevang (skredsikring) 
•    Fv. 5591 Rørdalsfjord (bru)

2.    Region Fjordane ber om at dei prosjekt som vart tatt ut av økonomiplanen grunna strammare økonomi og høg lånegjeld, vert arbeidde inn i budsjett og økonomiplan i den rekkefølgje dei var prioriterte. For Region Fjordane gjeld det følgjande prosjekt: 
•    Fv. 5704 Brandsøy- Solheim (G/S)
•    Fv. 57 Strandanes-Holmeli (regional hovudveg) 
•    Fv. 61 Naveosen- Brubakken (vegprosjekt)
•    Fv. 60 Hildestranda (G/S)
•    Fv. 615 Sandane-Fitje (trafikktryggleik - G/S)
•    Fv. 611 Sæle-Engebø - samfinansiering mellom fylkeskommune/Nordic Mining. Region Fjordane forventar at fylkeskommunen følgjer opp inngått avtale om spleiselag, og brukar midlane til punktvis utbetring/møteplassar. 
 

3.    Region Fjordane viser til gjeldande fylkeskommunale vedtak om å bruke overskotsmasse frå store tunnelprosjekt i Nasjonal Transportplan til utbetring av aktuelle tilkomstvegar. Prioriterte prosjekt i NTP og tilkomstvegar som er relevante i den samanheng er:
•    E39 Storehaugen-Førde – bruk av masser til utbetring av Fv. 57 Storehaug – Bygstad 
•    Stad skipstunnel – bruk av masser til utbetring av Fv. 620 Kjøde-Sandvik.

4.    Sogn og Fjordane har få vegprosjekt som er finansierte med bompengar. 
•    Regionrådet støttar Fjaler kommune sitt initiativ til bompengefinansiering av tiltak på Fv.57 for å utbetre den smale og kronglete vegen. Den er definert som regional hovudveg og ein bør sjå heilskapleg på prioriterte budsjettmidlar til strekka og potensialet som ligg i bompenger for å få utbetra parsellane Strandanes-Holmeli, Sætrenes-Strandanes.  
•    Region Fjordane ber om samarbeid med fylkeskommunen for realisering, framdrift og finansieringsmåtar av parsellar av Kystveg Florø – Måløy. Regionrådet peikar på at regionforstørring mellom Nordfjord og Sunnfjord er eit viktig prosjekt som må være eit mål for fylkeskommunen å realisere.

5.    Region Fjordane er samd i fylkeskommunen sin strategi om å ta vare på det vegnettet vi har, utbetre der ein kan og byggje nytt der ein må. I vår region er det behov for møteplassar og strekningsvise utbetringar for å betre framkomsten på lågtrafikkerte vegar. Vi ber difor om at vedlikehald og punktutbetring av eksisterande vegnett må prioriterast. Ramma til slike tiltak må styrkast. Det er vidare viktig at midlar til trafikktrygging vert vidareført. 
 

6.    Region Fjordane er positive til samfinansiering og spleiselag mellom det offentlege og private næringsliv for å kunne gjennomføre fleire tiltak på fylkesvegnettet vårt. Fylkeskommunen løyver midlar til ulike formål td. trafikktryggleik, mindre utbetringar, strekningsvis utbetring eller gjennom samfinansiering. Vi viser til fylkestingssak 22/093 om «samfinansiering av fylkesvegprosjekt» og vil peike på nokre utfordingar knytt til at kommunane må vere «bank»  og koordinere prosjekta. I vår region vil vi peike på nokre prosjekt:
•    Fv. 617 Raudeberg – Kapellneset : Prosjekt er ein del av samfinansiering porteføljen vedteke fylkestinget 22/042. Det er potensiale for samfinansiering mellom fylkeskommune, næringsliv og kommune i dette prosjektet. Prosjektet vil medverke til infrastrukturbygging som løyser ut større satsingar innan fiskeri- og maritimsektor på strekning Måløy-Raudeberg.
•    Viser til kommunane sine innsendte innspel

7.    Planavklaringar/ planmidlar
•    Planmidlar til bru i Innvik Fv 60 er vedteke i budsjett og må følgjast opp. Denne heng saman med flaum og rassikring av Storeelva i Innvik. 
 

8.    Fjordane Regionråd vil peike på at det er viktig å få rusta opp kollektivknutepunkt. Knutepunktet på Voss er eit godt døme på samskapingsprosjekt som bidreg til sentrumsutvikling. Ein bør difor ha fokus på å gå i dialog med eigarar for å utvikle framtidsretta og gode løysingar. I vår region handlar det om kollektivknutepunkt i Førde som er under planlegging og Stryn, Måløy og Høyanger. 

9.    Region Fjordane ber om at Fylkeskommunen må følgje opp prosjekt knytt til trygg ferdsel  gang og sykkelvegar som er vedteke. Desse ligg inne i vår liste under punkt 2. 

10.    Vestland fylke har det mest rasutsette vegnettet i landet, og fylket må arbeide for auka rammer til rassikring. Det må også takast i bruk innovativ rassikring og rasforebyggande teknologi så ein får rassikra fleire punkt. Vestland fylkeskommunen må støtte opp om nasjonal rasfaktor som fangar opp behovet i fylket vårt og sikrar pengar til rassikring. I Region Fjordane er det mange rasfarlege punkt med høg rasfaktor, som må prioriterast i denne rekkjefølgja:
•    Fv 5724 Oldedalsvegen med fjelltunnel Heimefonna/Bukkeskora/ Sandvika og strekningsvis utbetring (samansett av fleire raspunkt med rasfaktor frå 5,72- 4,46)
•    Fv 55 Høyanger – Nordeide og Fv 5442 og Fv 5586 (rasfaktor 3,75)
•    Fv. 615 Hopsstranda – rassikring/trafikktrygging vha ny teknologi. Aluminium-/ståloverbygg (rasfaktor 3,05)
 

11.    Det er viktig at ein står fast på tidlegare prioriteringar, og Regionrådet støttar difor Sogn Regionråd si prioritering av rassikring i Balestrand med bru over Esefjorden.
 

Sist oppdatert: 31.05.2025
Forfattar: Elisabeth Hatlenes